ADUNA nay 19 ka bag-ong mga kaso sa coronavirus disease 2019 (Covid-19) sa Siyudad sa Sugbo, base sa taho sa Department of Health-Central Visayas (DOH 7), Sabado, Marso 28, 2020.
Sa 19, 16 ang anaa karon sa lain-laing mga tambalanan, duha ang nangamatay, usa ang nakarekober.
Aduna usay duha ka bag-o nga mga kaso nga nalista sa Siyudad sa Lapu-Lapu, usa sa Probinsiya sa Sugbo, ug usa sa Negros Oriental (kinsang pasyente namatay niadtong Marso 23, 2020.)
Sa kinatibuk-an, aduna nay 26 ka mga kompirmadong kaso sa Covid-19 sa Central Visayas.
Sa 26 ka mga kaso, 20 ang anaa nanga-admit sa tambalanan, upat ang nangamatay, duha ang nakarekober.
Una na nga nataho sa DOH 7 nga adunay tulo ka nag-una nga mga kaso, lakip na ang usa ka positibo sa Mandaue City nga na-admit sa Chong Hua Hospital, usa sa Dumaguete City kinsa namatay niadtong March 15, 2020, ug ang usa ka 60-anyos nga babayeng Chinese national nga nagpaalim sa Bohol ug nakarekober.
Matod sa DOH 7 ang mga nangamatay nga pasyente aduna nay gidala dala daan nga mga sakit.
Matod ni Jaime Bernadas, director sa DOH 7, karon nga nahatagan na og sertipikasyon ang VSMMC sub-national laboratory nga mo-release og resulta sa mga tests, makapaabot ang publiko sa pagsaka sa gidaghanon sa mga positibo nga kaso.
Niadtong Biyernes, March 27, gihatagan na sa Research Institute for Tropical Medicine og sertipikasyon ang VSMMC sub-national laboratory aron sa pagbuhat og exam ug pag anunsiyo sa resulta niini.
“We ask the public not to panic as containment measures have already been in place in coordination with the respective local government units (LGU), and the local police of the confirmed cases,” segun ni Bernadas.
Padayon sab nga nagpahinumdom ang DOH 7 sa publiko sa pagtuman sa physical social distancing, paghugas og kamot, paglikay sa daghang mga tapok sa tawo, ug pagpakatap og di verified nga mga balita. /
