Sugbo dunay igong supply sa pagkaon; Ferro: ayaw og panic

Matod ni Police Brigadier General Albert Ignatius Ferro, di angay nga mabalaka ang mga Sugboanon tungod kay igo pa ang supply sa pagkaon sa Central Visayas.

Mao usab kini ang gipasalig ni Lapu-Lapu City Mayor Junard Chan sa mga Oponganon.

Awhag ni Ferro sa publiko nga di mag-panic buying nga una nang nabantayan sa Huwebes, Marso 26, ug Biyernes, diin daghan sa mga tawo ang naglinya sa grocery stores aron mamalit og daghang pagkaon.

“Just don’t take everything in the groceries because the supply line here in the province of Cebu is perfectly big. Naa tay poultries, piggeries and our rice dili pa mahurot. So, dili ta mag-panic,” matod ni Ferro.

Motabang

Iyang gipasalig nga naa ang gobyerno andam motabang sa mga tawo nga nanginahanglan ning panahon sa kalisod.

Labing maayo nga kon way buhaton, naa lang kanunay sa sulod sa balay.

Ubanan usab kini sa hugot nga pag-ampo sa labaw nga makagagahom tungod kay dako ang iyang pagtuo ug pagsalig nga molabay lang ang tanan.

“If you have nothing important to do outside, stay home. Assistance will be given to every member of the community who needs help. Please cooperate. Stay positive because in Cebu, we will heal as one,” matod ni Ferro.

Gitahasan na usab niya ang mga city ug provincial police office directors sa pag-monitor sa ilang tagsa-tagsa ka mga hurisdiksyon niadtong maghuot na sa dagkong mga tindahan aron kalikayan nga magdikit na ang mga tawo.

Samtang nagbutang na usab si Cebu City Police Office officer-in-charge Colonel Hector Grijaldo og personnel sa gawas sa South Bus Terminal aron abagan ang kapulisan sa probinsya sa Sugbo nunot sa pagdagsa sa daghang mga pasahero nga mopauli sa probinsya.

Gipanglantawan nga sa di pa ipatuman ang ECQ sa Dakbayan sa Sugbo karong adlawa, Marso 28, daghan ang mobiyahe paingon sa kalungsuran sa lalawigan sa Sugbo.

Lapu-Lapu City

Samtang nipasalig si Chan nga adunay igong supply sa pagkaon ang siyudad alang sa mga indigent resident sa mainland Lapu-Lapu ug isla sa Olango atol sa pagpatuman sa nga sugdan karong adlawa, Marso 28.

Samtang si Kongresista Paz Radaza sa Lapu-Lapu City, door-to-door sab nga nitunol og hinabang alang sa mga nag-unang panginahanglan sa mga residente sa pipila ka mga barangay sa isla, inabagan sa mga barangay opisyal.

Ang City Hall nang-apod-apod og bugas ug groceries ngadto sa 11 ka mga barangay sa Olango, samtang sunod semana isunod sa paghatag ang sa mainland Lapu-Lapu.

Gipahibawo ni Chan nga ang unang hugna sa maong distribution gisugdan niadtong miaging buwan alang niadtong trabahante sa tourism sector nga nawad-an og panginabuhian sa dihang anam nga mihinay ang pagpangabot sa mga langyaw nga moduaw sa siyudad gumikan sa coronavirus outbreak.

Moabot ngadto sa 8,000 ka mga kawani nga naglakip sa boatman, local tour guide, gagmay nga negusyante og souvenirs ug ubang shops may kalabutan sa turismo giaporan sa maong hinabang gikan sa siyudad.

Ang mga personnel sa City Social Welfare and Development nga gipangulohan Abeth Cuizon maoy nangunay sa pagpang-apod apod sa food packs ngadto sa nagkadaiyang barangay sa isla.

Pahinumdum ni Chan nga ang gihatag nga hinabang sa Siyudad magsilbing back-up lang nga makapuno-puno sa panginahanglan sa matag pamilya.

Sa laing bahin, atol sa implementasyon sa ECQ, wa nay mga publikong sakyanan nga tugotan nga makabiyahe gawas sa mga modern jeepney nga i-deploy sa matag barangay aron masakyan niadtong frontliners sama sa medical workers ug uban pa.

Giklaro sa mayor nga magpadayon ang operasyon sa mga pumpboat ug ferryboats nga mobiyahe gikan sa mainland Lapu-Lapu ug Olango island vice versa sa paghatod sa mga pasahero nga adunay importanteng tuyo sa mainland sama sa pagpangumpra alang sa ilang panginahanglan o konsumo.

 

Sun.Star Superbalita Cebu

Sun.Star Superbalita Cebu

Una ug nag-una nga inadlaw nga mantalaan nga Binisaya.

Related Posts

Next Post

Discussion about this post

Must Read

Recommended

Welcome Back!

Login to your account below

Retrieve your password

Please enter your username or email address to reset your password.

Are you sure want to unlock this post?
Unlock left : 0
Are you sure want to cancel subscription?