CEBU, Philippines — Miulbo sa kasuko si Gobernador Gwendolyn Garcia ngadto ni Mactan Cebu International Airport General Manager Steve Dicdican pagkasayod nga aduna pa gihapoy mga langyaw nga nakalusot sa tugpahanan bisan gidili na ang pagdawat og flights sa maong tugpahanan sugod Marso 27.
Ang maong mga langyaw gikatahong gikan sa ubang probinsya luwan og pribadong abyon aron didto manukad sakay og abyon pabalik sa ilang mga nasud.
Sumala pa nga 38 ka langyaw nga sakay sa lima ka private planes gikan Manila, Siquijor, Siargao , Butuan ug Caticlan ang niabot sa MCIA nga giingong may pagtugot ni Dicdican apan giingong wala mopahibalo sa gobernador.
Nasuko si Garcia human nasayran nga ang maong mga langyaw gipa check-in sa duha ka hotels nga gihulagway sa gobernador nga “special treatment” ug paglapas sa gipatumang COVID-19 protocols. “It’s been such a frustrating battle when fellow Cebuanos do not cooperate with us, do not join hands with us to protect Cebu and the Cebuanos,” sumala pa niya sa press conference.
Si Dicdican sa iyang bahin miingon igo ra siyang nagtuman sa kamandoan sa nasudnong kagamhanan ug nagsubay kini sa Bayanihan Act nga diin bugtong ang Presidente lang ang dunay otoridad pag-limit sa transportsyon ug ang tanang LGUs kinahanglang nagsubay direktiba sa nasudnong gobiyerno.
Sumala pa niya, bisan sila nakurat sab sa pagabot sa maong mga langyaw apan dunay pagtugot sa Inter-Agency Task Force Resolution No. 15 ang maong flight. “I am just following the law and the national directive. I suggest LGUs do the same. The air transportation sector is under the authority of the President and the DOTr/IATF during this time of national emergency, not the LGUs,” tubag pa ni Dicdican. /IBM (BANATNEWS)
March 31, 2020 – 12:00am